ໃນວັນທີ 17 ທັນວາ 2021 ນີ້, ຢູ່ທີ່ຫ້ອງປະຊຸມວິທະຍາ ໄລເຕັກນິກແຂວງວຽງຈັນ ໄດ້ຈັດພິທີຮັບຮອງເອົາ 5 ໜ່ວຍພັກທີ່ຂຶ້ນກັບຄະນະພັກຮາກຖານວິທະຍາໄລເຕັກນິກແຂວງວຽງຈັນ ເປັນໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ 2020 ຄື: ໜ່ວຍພັກພະແນກຈັດຕັ້ງ-ບໍລິຫານ ແລະ ຄະຫະກຳ, ໜ່ວຍພັກພະແນກວິຊາການ ແລະ ພາກວິຊາກະສິກຳ, ໜ່ວຍພັກພະແນກກິດຈະການ ແລະ ປ່າໄມ້ສິ່ງແວດລ້ອມ, ໜ່ວຍພັກພາກວິຊາບໍລິຫານທຸລະກິດ ແລະ ໄຟຟ້າ, ໜ່ວຍພັກພາກວິຊາເຄຫາສະຖານ ແລະ ເຕັກໂນໂລຊີ ໃຫ້ກຽດມອບໃບຢັ້ງຢືນໃນຄັ້ງນີ້ໂດຍ ສະຫາຍ ທອງສະຫວັນ ວົງສຳພັນ ຮອງເລຂາພັກແຂວງ ແລະ ຮັບໂດຍເລຂາໜ່ວຍພັກ 5 ໜ່ວຍດັ່ງກ່າວ, ເຂົ້າຮ່ວມໃນພິທີຄັ້ງນີ້ ມີ ສະຫາຍ ອ໋ອດ ແສງພິມ ກຳມະການພັກແຂວງ, ຫົວໜ້າພະແນກສຶກສາທິການ ແລະ ກິລາແຂວງວຽງຈັນ, ມີຄະນະພັກຮາກຖານ, ເລຂາໜ່ວຍພັກອ້ອມຂ້າງ, ພ້ອມດ້ວຍສະມາຊິກພັກສົມບູນ ແລະ ສຳຮອງທັງ 5 ໜ່ວຍພັກເຂົ້າຮ່ວມ. ສະຫາຍ ທອງຫຼໍ່ ວິໄລທອງ ເລຂາຄະນະພັກຮາກຖານ, ຜູ້ອຳນວຍການວິທະຍາໄລເຕັກນິກແຂວງວຽງຈັນ ກ່າວບາງຕອນໃນກອງປະຊຸມຄັ້ງນີ້ວ່າ: ຄະນະພັກຮາກຖານວິທະຍາໄລເຕັກນິກແຂວງວຽງຈັນ ແມ່ນຄະນະພັກຮາກຖານໜຶ່ງທີ່ຂຶ້ນກັບຄະນະຈັດຕັ້ງແຂວງ ປະກອບມີ 5 ໜ່ວຍພັກ ມີສະມາຊິກພັກທັງໝົດ 76 ສະຫາຍ, ຍິງ 34 ສະຫາຍ, ໃນນີ້ເປັນສະມາຊິກພັກສຳຮອງ 10 ສະຫາຍ, ຍິງ 3 ສະຫາຍ. ຜ່ານການຊຸກຍູ້, ຕິດຕາມ ແລະ ກວດກາເຫັນວ່າບັນໜ່ວຍພັກທີ່ຂຶ້ນກັບ ໄດ້ດຳເນີນການກໍ່ສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ ແລະ ໄດ້ດຳເນີນຕາມຂັ້ນຕອນ, ບັນລຸຕາມເງື່ອນໄຂ, ມາດຖານ ແລະ ປະກອບເອກະສານຢ່າງຖືກຕ້ອງຕາມຄຳສັ່ງແນະນຳຂອງຄະນະພັກຂັກເທິງ. ເປັນຕົ້ນ ດ້ານການເມືອງ ຄະນະພັກຮາກຖານ, ຄະນະໜ່ວຍພັກ ແລະ ສະມາຊິກພັກ ໄດ້ຈັດຕັ້ງເຊື່ອມຊຶມແນວທາງ, ນະໂຍບາຍ, ມະຕິ, ຄຳສັ່ງ, ກົດລະບຽບຂອງພັກ, ກົດໝາຍ ແລະ ລະບຽບການຕ່າງໆຂອງລັດຢ່າງທົ່ວເຖິງ ແລະ ຄົບຖ້ວນ. ດ້ານແນວຄິດ ເຫັນວ່າຄະນະພັກຮາກຖານ, ຄະນະໜ່ວຍພັກ ແລະ ສະມາຊິກພັກ ມີຄວາມເປັນເອກະພາບສູງກັບແນວທາງການປ່ຽນແປງໃໝ່ຢ່າງມີຫຼັກການຂອງພັກ, ຍຶດໝັ້ນຈຸດໝາຍສັງຄົມນິຍົມຢ່າງສະເໝີຕົ້ນສະເໝີປາຍ, ສາມາດຈຳແນກໄດ້ມິດ-ສັດຕູຢ່າງຈະແຈ້ງ, ບໍ່ຫວັ່ນໄຫວຄອນແຄນຕໍ່ສະພາບການຕ່າງໆທີ່ເກີດຂຶ້ນ. ດ້ານການຈັດຕັ້ງ ໄດ້ຍຶດໝັ້ນການນຳພາ-ຊີ້ນຳ ຕາມ 5 ຫຼັກການ 3 ທິດນຳຂອງພັກ ໃນການກໍ່ສ້າງ ແລະ ປັບປຸງພັກ, ນຳພາ ແລະ ເຂົ້າຮ່ວມດຳເນີນຊີວິດການເມືອງຂອງໜ່ວຍພັກຢ່າງເປັນປົກກະຕິ. ດ້ານແບບແຜນວິທີນຳພາ ໄດ້ຍຶດໝັ້ນ ແລະ ເສີມຂະຫຍາຍແບບແຜນນຳພາທີ່ເປັນມູນເຊື້ອອັນດີງາມຂອງພັກ, ແບບແຜນນຳພາຕິດແທດກັບມະຫາຊົນ, ຍຶດໝັ້ນປະຕິບັດຫຼັກການລວມສູນປະຊາທິປະໄຕຢ່າງເຂັ້ມງວດ, ເຮັກວຽກເປັນໝູ່ຄະນະ, ບຸກຄົນຮັບຜິດຊອບ, ສຽງສ່ວນໜ້ອຍຂຶ້ນກັບສຽງສ່ວນຫຼາຍ, ຂັ້ນລຸ່ມປະຕິບັດຕາມຂັ້ນເທິງ. ການນຳພາປະຕິບັດໜ້າທີ່ການເມືອງ ໄດ້ເອົາໃຈໃສ່ປະຕິບັດໜ້າທີ່ການເມືອງຂອງຕົນທີ່ຖືກມອບໝາຍ ຖືເອົາການນຳພາທາງດ້ານການເມືອງ, ແນວຄິດ, ການຈັດຕັ້ງ, ວິຊາສະເພາະ ເປັນການພັດທະນາພະແນກ ແລະ ພາກວິຊາພາຍໃນວິທະຍາໄລ. ຜ່ານການສັງລວມການຕີລາຄາ ແລະ ຈັດແບ່ງປະເພດສະມາຊິກພັກ, ໜ່ວຍພັກ ໃນການປະເມີນເປັນ ໜ່ວຍພັກ ປອດໃສ ເຂັ້ມແຂງ ໜັກແໜ້ນ ສາມາດສັງລວມໄດ້ຄື: ຕີລາຄາຄຸນນະພາບ ແລະ ຈັດແບ່ງປະເພດສະມາຊິກພັກ ເປັນສະມາຊິກພັກແຂງ 65 ສະຫາຍ, ຍິງ 33 ສະຫາຍ, ສະມາຊິກພັກກາງ 1 ສະຫາຍ, ຍິງ 1 ສະຫາຍ, ບໍ່ໄດ້ຈັດປະເພດ 10 ສະຫາຍ, ຍິງ 3 ສະຫາຍ (ສະມາຊິກພັກສຳຮອງ), ຕີລາຄາແບ່ງປະເພດໜ່ວຍພັກ ເປັນໜ່ວຍພັກແຂງ ທັງ 5 ໜ່ວຍພັກ.
