ວິທະຍາໄລເຕັກນິກ ແຂວງວຽງຈັນ ໄດ້ເປີດກອງປະຊຸມປຶກສາຫາລືລະຫວ່າງສະຖານປະກອບການ ກັບ ວິທະຍາໄລເຕັກນິກແຂວງວຽງຈັນຂຶ້ນ ໃນຕອນເຊົ້າຂອງວັນທີ 30 ຕຸລາ 2020 ກ່ຽວກັບການສ້າງກຳລັງແຮງງານ. ໃຫ້ກຽດເປັນປະທານໃນພິທີໂດຍ ທ່ານ ສາຍຄຳ ພັນທະວົງ ຮອງຫົວໜ້າກົມອາຊີວະສຶກສາ ແລະ ປະທານຮ່ວມແມ່ນ ທ່ານ ບຸນຖົມ ພົງວິໄລ ຮອງຫົວໜ້າພະແນກແຮງງານ ແລະ ສະຫວັດດີການສັງຄົມ ແຂວງວຽງຈັນ, ເຊິ່ງມີຕ່າງໜ້າຈາກສະຖານປະກອບການ ຫ້າງຮ້ານ ແລະ ຫົວໜ່ວຍທຸລະກິດ ອ້ອມຂ້າງພາຍໃນແຂວງວຽງຈັນ ແລະ ນະຄອນຫຼວງເຂົ້າຮ່ວມ.
ໃນກອງປະຊຸມແຕ່ລະພາກສ່ວນໄດ້ຄົ້ນຄວ້າປຶກສາຫາລືສົນທະນາແລກປ່ຽນເຊິ່ງກັນແລະກັນ ລະຫວ່າງວິທະຍາໄລເຕັກນິກ ແຂວງວຽງຈັນ (ໃນນາມຜູ້ສ້າງແຮງງານ) ກັບ ສະຖານປະກອບການ (ໃນນາມຜູ້ຊົມໃຊ້ແຮງງານ), ເພື່ອໃຫ້ສອດຄອງລະຫວ່າງສອງພາກສ່ວນໃນການສ້າງກຳລັງແຮງງານຕອບສະໜອງຕາມຄວາມຕ້ອງການຂອງສັງຄົມ ກໍ່ຄືຕະຫຼາດແຮງງານ.
